იტალიის ხელისუფლების წარმომადგენელთა განცხადებით, ნობელის პრემიის ლაურეატი მწერალი - დარიო ფო 90 წლის ასაკში გარდაიცვალა.

 

დარიო ფოს, რომელიც საზოგადოებისთვის ცნობილი გახდა საკუთარი პოლიტიკური სატირით - ერთი ანარქისტის შემთხვევითი სიკვდილი, ნობელის პრემია 1997 წელს მიენიჭა – „მას, ვინც ამა ქვეყნის ხელისუფალთა გაქილიკებისა და ჩაგრულთა ღირსების დაცვისას შუა საუკუნეების ყველა ოხუნჯი დაჯაბნა“.

 

„მხურვალე მადლობას გწირავთ ყველა მოხეტიალე მსახიობის, მასხარის, კლოუნის, ჯამბაზისა და მუცლითმეზღაპრის სახელით!“ – ამ სიტყვებით მიესალმა 1997 წელს, შვედეთის აკადემის წევრებს, იტალიელი ნობელიანტი.

 

იტალიური მედიის ინფორმაციით, მწერალს თვეების განმავლობაში ფილტვები აწუხებდა, ბოლო 12 დღის განმავლობაში კი ჰოსპიტალიზებული იყო.

 

ინტელექტმა პირველად გამოსცა ქართულად დარიო ფოს კრებული, სადაც ორი პიესაა შესული: ერთი ანარქისტის შემთხვევითი სიკვდილი (თარგმნა ილია გასვიანმა) და იოჰან პადანი (თარგმნა მარიეტა ჩიხლაძემ). წიგნს თან ერთვის დარიო ფოს სანობელო ლექცია.